Suriya Prezidenti Bəşər Əsədin kiçik qardaşı Mahir Əsəd Dəməşqin Əl Maza hərbi aerodromuna hücum zamanı yaralanıb.
Shafaqadogru.com xəbər verir ki, İsrailin "9tv.co.il” saytı hücumun dünən gecə baş verdiyini yazıb. Suriyalı hüquq müdafiəçiləri hücum zamanı ölənlərin olduğu, eləcə də hücumu İsrailin təşkil etdiyi haqqında məlumat yayıb.
Qeyd edək ki, Mahir Əsəd Prezident Bəşər Əsədin kiçik qardaşıdır. General Mahir Əsəd ölkənin ikinci ən nüfuzlu şəxsi hesab edilir. O, Suriya Milli Qvardiyası və 4-cü elit tank diviziyasına rəhbərlik edir.
Mahir Əsəd İranın Suriyadakı əsas tərəfdarı sayılır. Tehranın Suriyada öz siyasətini məhz Mahir Əsədin vasitəsilə həyata keçirdiyi bildirilir. Mahirdən fərqli olaraq, Bəşər Əsəd daha dünyəvi şəxs təsiri bağışlayır. O, rusiyayönlü siyasətin tərəfdarı hesab edilir.
