Rusiyanın Stavropol diyarında Gürcüstandan Moskvaya gedən avtobus yük maşını ilə toqquşub.
Bu barədə TASS məlumat yayıb.
Məlumata görə, hadisə Jeleznovodsk şəhərinin İnozemtsevo qəsəbəsi ərazisində baş verib.
Regional Dövlət Yol Müfəttişliyinin məlumatına görə, “Setra” markalı avtobusun sürücüsü sürət həddini aşıb və qarşıdakı KAMAZ yük maşını ilə lazımi məsafəni saxlaya bilməyib. Toqquşmadan sonra avtobus yoldan çıxaraq xəndəyə düşüb.
Qəza nəticəsində 5 nəfər hadisə yerində ölüb, 38 nəfər yaralanıb. Yaralılardan beşi uşaqdır.
Yaralılar Pyatiqorskdakı xəstəxanalara aparılıb.
***
Bakıdan Gürcüstana qatarla gedən, daha sonra avtobusla Moskva istiqamətində yola davam edən azərbaycanlılar Rusiyanın Stavropol diyarında ağır qəzaya düşüblər.
Teleqraf-ın məlumatına görə, bu barədə Stavropol diyarı üzrə Azərbaycan icmasının rəhbəri Fəxrəddin Yarıyev bildirib.
O deyib ki, avtobusda 50-dən çox Azərbaycan vətəndaşı olub. Qəza nəticəsində 6 nəfər həyatını itirib, bir neçə nəfər isə müxtəlif dərəcəli xəsarətlər alaraq xəstəxanaya yerləşdirilib.
Qeyd edək ki, hadisə zamanı ölən və yaralananların Azərbaycandan Moskvaya səfər etdikləri bildirilir.
