Şəfəqə Doğru » Gündəm » Apteklərdə dərmanlar həm bahalaşır, həm də yoxa çıxır - Fotolar

Apteklərdə dərmanlar həm bahalaşır, həm də yoxa çıxır - Fotolar

Apteklərdə dərmanlar həm bahalaşır, həm də yoxa çıxır - Fotolar

Apteklərdə ciddi böhran yaşanır: Dərmanlar həm bahalaşır, həm də yoxa çıxır

 


Valyuta bazarında yaşanan gərginlik, bankların dollar satmaqdan imtina etməsi, sahibkarların maliyyə durumunun pisləşməsi əczaçılıq sahəsində ciddi problemlərə yol açıb ki, bu da əhalinin sağlamlığını təhdid edir. 

Problemlərdən biri müxtəlif adda dərmanların apteklərdən yoxa çıxmasıdır. Əczaçılar bunun səbəbini aptek sahibinin maliyyə vəziyyətinin pisləşməsi ilə izah edirlər: "Bu sahədə inhisarçılıq yaranıb. Bəzi inhisarçı şirkətlər öz apteklərinə dərmanı ucuz, digərlərinə isə baha verirlər. Beləcə daha çox alıcı cəlb edirlər. Bu da bizim gəlirlərimizə təsir edir. Pul olmayanda isə yeni dərmanlar gətirmək çətinləşir. Alınan hər partiya dərmanın qiyməti öncəkindən ciddi şəkildə fərqlənir. Bahalaşma aptekləri sıradan çıxara bilər".

Bu sözləri "Zeytun" aptekdə çalışan, adının çəkilməsini istəməyən əczaçı deyir. 

Başqa bir əczaçı isə dərman qıtlığının səbəbini bankların dollar satmaması ilə əlaqələndirir. Xaricdən dərman gətirənlər indi onu almağa pul tapa bilmir. Hansı dərmanlar anbarlarda varsa, onları gətirib satırıq. ancaq elə dərman var ki, bitib və idxalçı şirkətlər də onları gətirə bilmirlər. Bu səbəbdən alıcılar bizdən narazı gedir. Bir dəfə gəlib reseptdəki dərmanların hamısını bizdə tapa bilməyən alıcı ikinci dəfə başqa yerə üz tutur".

"Avromed" aptekdə çalışan əczaçı isə bildirdi ki, dərmanla təmin olunma baxımından onların apteki daha üstündür: "İndi əksər apteklərdə dərmanların hamısını tapmaq olmur. Bunun səbəbini mən izah edə bilmərəm. Ancaq biz şirkətin apteki olduğumuz üçün bütün dərmanlar anbardan birbaşa gətirilir. Həm də qiymətlər, ucuz dərmanlarda 30-40 qəpik, bahalı dərmanlarda 3-5 manat arasında fərq edir. Bizdə daha ucuz olur. Bahalaşmaya gəlincə, bunu gizlətmək mümkün deyil. Gündəlik olaraq qəpik-qəpik artım davam edir. 3 ay öncə ilə müqayisədə 20 manatdan yuxarı bütün dərmanlarda 30 faizə yaxın bahalaşma olub".

Alıcılar isə birmənalı olaraq bahalaşmadan qan ağlayır: "Sağlamlığımız üçün baha-ucuz demədən məcbur olub alırıq. Mütəmadi istifadə etdiyimzi dərmanları hər həftə ayrı qiymətdə görürük. Təəssüf ki, imkanı olmayanlar ala bilmir. Bu da insanların sağlamlığına təhlükə deməkdir. Apteklərin qiymət siyasətinə nəzarət olmalıdır. Dövlət dəstək olmalıdır ki, qiymətlər çox artmasın. Çünki insanların çoxunun bahalı dərmanları almağa ehtiyac yoxdur". 

Qeyd edək ki, bazarda dərman qıtlığının yaranacağı barədə ekspertlər də xəbərdarlıq edir. Onlar bunu valyuta bazarında dolların satılmaması və qara bazarın ləğv olunması ilə əlaqələndirirlər. 

Azad İstehlakçılar Birliyinin sədri Eyyub Hüseynov isə bildirdi ki, bu gedişlə bir çox apteklər sıradan çıxa bilər: "Böyük dərman distibüterləri əhaliyə lazım olan dərmanları öz aptek şəbəkələrinə verirlər, alıb-satan distibüterlərə isə vermirlər. Bundan öncə isə belə idi ki, böyük dərman distibüterləri öz apteklərinə daha ucuz, digərlərinə isə baha verirdilər və onlar da baha satmağa məcbur olurdular. Bu da digər apteklərin sıradan çıxmasına gətirib çıxaracaq". (Musavat.com)