Türkiyədə elmi-tədqiqat layihələri həyata keçirən dosent Dr. Təhminə Bədəlova Azərbaycan Respublikasının Türkiyədəki Səfirliyinin nəzdində fəaliyyət göstərən Azərbaycan Mədəniyyət Mərkəzi tərəfindən "Fəxri Mükafat”a layiq görülüb.
Qaynarinfo-nun xəbərinə görə, Azərbaycan Milli Elmlər Akademiyasının Nizami Gəncəvi adına Ədəbiyyat İnstitutunun dosenti Dr. Tahminə Bədəlova Türkiyədə Azərbaycan ədəbiyyatı ilə bağlı konfrans və simpoziumlarda məruzələrlə çıxış edir, həmçinin bu sahədə yeni elmi layihələr reallaşdırır.
Onun "XI–XIX əsrlərdə Azərbaycan poeziyası” və "Nizami Gəncəvinin "Xəmsə”sindən seçmə hekayələr” adlı tədqiqat işləri Azərbaycan ədəbiyyatının Türkiyədə tanıdılması istiqamətində mühüm layihələr hesab olunur.
Alimin elmi məqalələri Türkiyədə "Dergipark” sisteminə daxil olan "Külliyat Osmanlı Araşdırmaları Dergisi”, "Eski Türk Edebiyatı Araştırmaları Dergisi”, "TURAN Uluslararası Sosyal ve Beşerî Bilimler Dergisi” və həmçinin Avrasiya Yazarlar Birliyinin "Kardeş Kalemler” dərgisi, Türk Ədəbiyyatı Vəqfinin "Türk edebiyatı”, "Türk dili ve edebiyatı” və "Üç Çizgi” jurnallarında dərc olunub.
Azərbaycan Mədəniyyət Mərkəzinin rəhbəri Samir Abbasovun dosent Dr. Tahminə Bədəlova ilə görüşündə onun Mərkəzin ədəbiyyat layihələrində iştirakı, böyük Azərbaycan şairi Nizami Gəncəvinin irsini araşdırmaq və tanıtmaq sahəsindəki fəaliyyəti yüksək qiymətləndirilib, ədəbiyyatımızın Türkiyədə tanıdılması ilə bağlı gələcək layihələr müzakirə olunub.
