Azərbaycanda çobanlar böyük yeyinti cinayətində ittiham olunur.
“Qafqazinfo”nun məlumatına görə, hadisə Salyan rayonunda baş verib.
Kəmaləddin Hüseynov və Ceyhun Əskərov çobanlıq etdikləri fermadan yarım milyon manatdan çox dəyəri olan xırda və iribuynuzlu heyvanları “aradan çıxarıblar”.
Çox sayda heyvanı oğurlanan Adil Qənbər oğlu Baxışov rayonda sahibkarlıq fəaliyyəti ilə məşğuldur. Onun bir neçə ferması, yüzlərlə mal-qarası var.
Sahibkar cinayətdən xəbər tutan kimi Kəmaləddin və Ceyhunun əməli barədə prokurorluğa şikayət edib.
İstintaqla təsdiq edilib ki, çobanlar fermada və fərdi həyətlərdə tikilmiş tövlələrdə saxlanılan ümumilikdə 1377 baş heyvanı-Simental cinsli Avstriya mənşəli erkək danaları, cins inəkləri, eləcə də çoxsaylı qoyun-quzu və keçi-çəpişi müxtəlif üsullarla ucuz qiymətə satıb, cinayətdən xəbərsiz olan satıcılardan aldıqları 586 min manat pulu mənimsəyiblər.
