Gürcüstan əhalisinin çoxunun banklara və lombardlara borcu var
- Tarix: 03-apr-2018, 11:21 - Bölmə: Gündəm / Manşet - Baxış sayı: 442

Gürcüstan əhalisinin banklara və lombardlara olan borcu durmadan artır

 


AZƏRTAC Gürcüstan Milli Statistika Xidmətinə istinadla xəbər verir ki, 2017-ci ilin sonunda ölkədə 609,4 min lombarda borcu olan vətəndaş qeydə alınıb. Bu da 2016-cı ilə müqayisədə xeyli çoxdur.

Xidmətin məlumatına görə, təkcə 2017-ci ildə insanlar lombardlardan 405,8 milyon lari (təqribən 166,6 milyon dollar) həcmində kredit götürüb. Kreditlərin 64,7 faizi milli valyuta, 35,3 faizi isə xarici valyuta ilə verilib.

Lombardlara borclu olanların 99,4 faizi fiziki şəxslərdir.

Lombarda borcu olanların 76,1 faizi paytaxt Tbilisiin payına düşür. İkinci yerdə Acariya (9,9 faiz), üçüncü yerdə İmeretiya (4,8 faiz), dördüncü yerdə isə 4,4 faizlə Sameqrelo-Zemo Svanete bölgəsi gəlir.

Lombardlara ən az borcu olan region azərbaycanlıların daha çox yaşadıqları Kvemo Kartli bölgəsidir – 2,8 faiz.

Gürcüstan əhalisinin ümumilikdı banklara olan borcu isə lap yüksək həddədir. Bəzi ekspertlərin sözlərinə görə, hazırda Gürcüstan əhalisinin 80 faizə qədərinin banklara borcu var.

İqtisadi məsələlər üzrə gürcü ekspert Mixail Dundua bildirib ki, 2017-ci ilin sonunda Gürcüstan əhalisinin hər min nəfərdən səkkiz yüzünün banklara borcu olub. Onun sözlərinə görə, bu göstərici ilə Gürcüstan dünyada birinci yerdədir. M. Dundua deyib ki, bu göstərici Beynəlxalq Valyuta Fondunun hesabatında da qeyd olunub.

"Kredit-info” təşkilatının direktoru Sandro Qomiaşvili isə deyib ki, 2016-cı ildə banklara kreditlə əlaqədar 12 milyon 500 min müraciət olunub. 2017-ci ildə isə müraciətlərin sayı 25 milyonu ötüb. Müraciətlərin böyük əksəriyyəti hüquqi şəxslərin payına düşür.

Direktor bildirib ki, 3,7 milyon əhalisi olan ölkə üçün bu çox böyük göstəricidir. Rəqəmlərə əsasən, ölkədə 80 faizə qədər əhalinin krediti var.

Ekspertlərin sözlərinə görə, buna baxmayaraq, əhalinin kredit ödənmələrində ciddi problemlər yaşanmır.

Oxşar xəbərlər