Ötən gün Türkiyənin Malatya şəhərində zəlzələ nəticəsində dağıntılar altında qalan 4 azərbaycanlı tələbə - Samir Quliyev, Şahin Verdiyev, Hümam İsmayıllı və Gündüz Nəzərzadənin xilas edilməsi barədə məlumatlar yayılıb. Lakin adları çəkilən tələbələrin harada olmasına dair xəbər verilməyib.
Shafaqadogru.com xəbər verir ki, Modern.az-ın əməkdaşı Azərbaycanın Türkiyədəki səfirliyinin mətbuat katibi Aygün Qocayeva ilə əlaqə saxlayaraq, tələbələrin xilas edilməsi barədə məlumatlara münasibət öyrənib.
Onun sözlərinə görə, səfirlik həmin tələbələrlə əlaqə qura bilməyib.
“Hazırda tələbələrin dağıntılar altından çıxarılması ilə bağlı məlumat yoxdur. Burada dövlət qurumları çox gərgin vəziyyətdə işləyir. Tələbələrin çıxarılması ilə bağlı bizə dövlət qurumlarından rəsmi təsdiq gəlməyib. Biz sizin vasitənizlə müraciət edirik ki, tələbələrin yaxınları məlumat ala bilirsə, bizimlə əlaqə saxlasınlar”,- deyə səfirlik rəsmisi bildirib.
Qeyd edək ki, S.Quliyev, Ş.Verdiyev, H.İsmayıllı və G.Nəzərzadə Malatyadakı İnönü Universitetinin tələbələridir.
Tələbələrin dağıntı altından çıxarılması barədə məlumat yoxdur — SƏFİRLİK
