Bu gün, oktyabrın 13-də Bakının Binəqədi rayonunda yerləşən «Büllur» sarayda keçirilən Müsavat Partiyasının IX qurultayı başa çatıb.
Musavat.com-un verdiyi məlumata görə, qurultayda ən çox səs toplayaraq 262 səslə partiyanın başqanı yenidən Arif Hacılı seçilib. Digər namizədlər Tofiq Yaqubluya 51 səs, Yadigar Sadıqlıya isə 20 səs verilib.
Qeyd edək ki, 2014-cü ildə partiyanın VIII qurultayında da Arif Hacılı başqan postuna seçilmişdi.
IX qurultay ərəfəsində partiya başqanlığına 3 şəxs iddiasını qoymuşdu. Bunlar Müsavat Partiyası Divanının üzvləri Tofiq Yaqublu, Yadigar Sadıqlı və hazırkı başqan Arif Hacılı idi.
Nəticənin açıqlanmasından sonra səsvermənin yekunlarına münasibət bildirən başqanlığa namizəd Yadigar Sadıqlı "Düzdür, ədalətsiz seçkilər oldu, amma saxtakarlıqla bağlı bir şey deyə bilmərəm” deyib.
Digər namizəd Tofiq Yaqublu isə Arif Hacılını qələbə münasibəti ilə təbrik edib.
