Azərbaycanda qeyri-sabit hava şəraiti davam edir.
Shafaqadogru.com xəbər verir ki, son məlumatlara əsasən, Naxçıvan, Şahbuz, Daşkəsən, Yevlax, Gədəbəy, Göygöl, Naftalan, Gəncə, Ağstafa, Ceyrançöl, Tovuz, Balakən, Ağsu, Qəbələ, Şəki, Şahdağ, Oğuz, Quba, Şabran, Altıağac, Xaltan, Qusar, Qırız, İsmayıllı və Şəkidə şimşək çaxıb, leysan xarakterli yağış yağıb.
Balakən-Şəki zonasında yağıntı intensiv və güclü olub. Leysan yağışlar nəticəsində İsmayıllı rayonu ərazisindən axan Göyçay çayından, Oğuz rayonundan axan Əyriçaydan, Zaqatala rayonu ərazisindən axan Muxax çayı və Talaçaydan, Qax rayonundan axan Kürmükçaydan, Qəbələ rayonundan axan Dəmiraparançaydan, Quba rayonu ərazisindən axan Vəlvələçaydan sel keçib.
Gecə saatlarında Qaxın bəzi avtomobil yollarında hərəkət dayandırılıb. Şəki-Qax, Qax-Zaqatala və Qorağan-Qax avtomobil yollarında bir neçə ərazidə ağacların yollara aşması nəticəsində hərəkət məhdudlaşıb. Bundan başqa rayonun İlisu kəndi ərazisində sel suları özü ilə bərabər lil və qaya parçaları gətirərək yolun hərəkət hissəsini doldurub.
Saat 23:30 radələrində Zaqatala rayonuna xırda dənəli dolu düşüb. Şəki şəhərində güclü külək nəticəsində binanın dam örtüyü qoparaq 5 avtomobilin üzərinə düşüb. Hadisə nəticəsində xəsarət alan olmayıb, lakin nəqliyyat vasitələrinə ziyan dəyib. Bir sıra rayonlarda elektrik enerjisinin verilişində fasilə yaranıb.
Daşkəsən, Göygöl, Şəmkir, Quba, Qusar, Şahdağ, Altıağac, Balakən, Şamaxı, Qrız, Lerikdə duman müşahidə olunub.
İsmayıllı rayonunun Gəndov, Namazgah və Lahıc qəsəbəsində şəxsi təsərrüfatlara, yollara, ziyan dəyib, qaz, su və elektrik xətlərində problemlər yaranıb. Bu istiqamətdə olan turizm obyektlərinə sel nəticəsində ziddi ziyan dəydiyi bildirilib. Leysan xarakterli yağışdan sonra İsmayıllı-Lahıc yolu bağlanıb. Sel səbəbindən avtomobil yolunun hərəkət hissəsi lil qatı və daşlarla örtülüb. Lahıca elektrik enerjisi və qazın verilişi dayandırılıb.
Ekologiya və Təbii Sərvətlər Nazirliyinin Milli Hidrometeorologiya Xidməti xəbərdarlıq edib ki, ölkə ərazisində qeyri-sabit, yağıntılı və dumanlı hava şəraiti ilə əlaqədar olaraq magistral avtomobil yollarında görünüş məsafəsinin 300-700 m-dək məhdudlaşacağı ehtimal olunur.
Qəbələ və Qax rayon Fövqəladə Hallar Komissiyasından verilən məlumata əsasən, leysan yağışları ilə bağlı elə də ciddi xəsarət, ya da təsərrüfatlara ziyanla bağlı məlumat daxil olmayıb. Sadəcə təhlükəsizlik baxımından külək əsərkən bəzi ərazilərdə elektrik enerjisinin verilməsində fasilə yaranıb. Elektrik enerjisinin verilməsində Zaqatala və Balakəndə də fasilələr müşahidə edilib. Hər iki rayon Fövqəladə Hallar Komissiyasından bildirilib ki, köhnə dirək və naqillərin keçdiyi ərazilərə baxış keçirilir, təhlükəsizlik təmin olunandan sonra enerjinin verilməsi bərpa edilir.
