Ermənistan-Rusiya birgə qoşun qruplaşmasının komandanı, general-mayor Andranik Makaryan iddia edib ki, birgə qoşun birləşmələri Qarabağda müharibə olacağı halda dərhal müdaxilə edəcək.
Publika.az xəbər verir ki, erməni general birgə qoşun növünün Ermənistan prezidentinin əmri ilə hərəkətə keçəcəyini də iddia edib.
Erməni general qeyd edir ki, Rusiya prezidenti birgə qoşun növünün Qarabağa müdaxilə etməsinin əleyhinə əmr verə bilməz.
Qeyd edək ki, birgə qoşun növü 2016-cı ilin 30 noyabrında yaradılıb. Müqaviləyə əsasən bu qoşunlar Rusiya və Ermənistan prezidentlərinin birgə əmrilə hərəkət edir. Birgə qoşuna daxil olan 4-cü ordu korpusu Türkiyə və Naxçıvan sərhədində yerləşir. Rusiya tərəfi deyir ki, Vladimir Putinin əmri olmadan birgə qoşun hərəkətə keçə bilməz, həmçinin, Kremldə inandırırlar ki, bu qoşunlar Qarabağ müharibəsində müdaxilə edə bilməz. Lakin erməni generalın sözləri şübhələrə yol açır. Makaryanın sözlərinə Rusiya rəsmi cavab verməyib.
Rusiyalı hərbi ekspert Aleksandr Xramçik erməni generalın dediklərinin doğru olmadığını bildirib.
Xramçik əlavə edib ki, Makaryanın "birgə qoşun Ermənistan prezidentinin əmri ilə hərəkət edəcək” sözləri yanlışdır.
"Qərar Moskva və İrəvanda birlikdə qəbul ediləcək. Çünki birgə qoşuna 102-ci hərbi baza da daxildir. Bu bazanın komandiri Rusiya Ali Baş Komandanının əmrinə uyğun hərəkət edir. Bu baxımdan, onun Ermənistanın ali baş komandanının əmrinə uyğun hərəkət etməyəcəyi dəqiqdir. Bu qoşun növünün Qarabağda müharibəyə müdaxilə etməsi də çətindir. Əgər müharibə Ermənistan ərazisinə keçərsə, bu zaman nəyisə ehtimal etmək olar. Lakin döyüşlər Qarabağda getdiyi müddətdə bu qoşun növü heç bir müdaxilə etməyəcək və Rusiya qarışmayacaq”, - deyə o bildirib.
Hərbi ekspert qeyd edib ki, birgə qoşunların Qarabağda müharibəyə müdaxiləsi üçün Putinin əmr verəcəyi inandırıcı deyil.
Onun fikrincə, Ermənistan prezidenti də bu qoşun növünün müharibəyə qarışması haqda əmr verə bilməz.
"Çünki qərarlar birgə qəbul ediləcək”, - deyə Xramçik vurğulayıb.
Qarabağda müharibə başlasa, Putin Naxçıvanla sərhəddəki orduya hansı əmri verəcək?
