“Bu gün Elm və Təhsil Nazirliyi yenidən onlayn formada şagird yerdəyişməsinə start verib. Bu, nazirliyin ən faydalı rəqəmsal xidmətlərindən biridir. Nazirlik bu rəqəmsal həll vasitəsilə, həm də bu prosesdə olan neqativlərin qarşını almağı hədəfləyib”.
“Qafqazinfo” xəbər verir ki, bu barədə İKT üzrə ekspert Osman Gündüz sosial şəbəkə hesabında bildirib.
O qeyd edib ki, məhz bu səbəbdən 9-cu sinfədək avtomatik olaraq reallaşan e-xidmət 10-cu siniflər üzrə yerdəyişmədə iki mərhələyə bölünür:
“Belə ki, bu siniflər üçün valideynlər əlavə sənədlər yükləməklə seçimi əsaslandırmalıdırlar. Nazirlik bunu ali məktəblərə daha rahat hazırlaşmaq üçün oxuduğu məktəbdən çıxan, dərslərə getməmək şərtilə adını rayon məktəblərinə yazdırmaq istəyənlərin qarşısını almaq üçün edib. Hansı ki bu, son zamanlaradək bəzi direktorların əsas gəlir mənbəyinə çevrilmişdi.
Xatırlayıram ki, ötən il, Gədəbəyin icra başçısı hansısa bir kənd məktəbinin 201 şagirdindən 11-ci sinif üzrə 55 şagirdin heç birinin məktəbdə olmadığını vurğulamışdı. O zaman bu kənd məktəbinin az qala 30%-nin 11-ci sinifdə oxuması diqqət çəkmişdi. Şübhələnmək üçün əsaslar yaranıb ki, bu kənd məktəbinə kənardan şagird miqrasiyası baş verib, daha doğrusu şagirdlərin özünün yox, onların adlarının bu məktəbə miqrasiyası olub”.
Ekspert əlavə edib ki, hazırda ETN-in, bütövlükdə hökumətin əlində yetərincə data formalaşıb, bununla da dövlət nəzarətini və ictimai nəzarəti, şəffaflığı daha effektiv təmin etmək mümkündür:
“Nazirliyin Ümumi Təhsil İnformasiya Sisteminin tərkib hissəsi olan sy.edu.az resursu da ölkə üzrə şagird miqrasiyasına nəzarət etmək üçün əhəmiyyətli bir rəqəmsal həlldir”.
Qeyd edək ki, proses sy.edu.az elektron sistemi üzərindən valideynlərin onlayn məktəb seçimi ilə həyata keçirilir.
