Azərbaycan Beynəlxalq Bankı investorlar üçün press-reliz yayıb.
"APA-Economics”in məlumatına görə, açıqlamada bankın əsas səhmdarı olan Azərbaycan hökumətinin 2015-2016-cı illər ərzində milli valyutanın devalvasiyaya uğraması nəticəsində bankın üzləşdiyi problemlərin həlli məqsədilə ABB-ə verdiyi dəstəkdən söhbət açılır.
Məlumatda bildirilib ki, hökumətin dəstək tədbirləri Azərbaycan Respublikası Prezidentinin 15 iyul 2015-ci il tarixli Fərmanı çərçivəsində Bankın problemli aktivlərinin dövlət qurumu və ABB-nin səhmdarlarından olan "Aqrarkredit” QSC-ə ötürülməsi və bunun müqabilində banka 10 milyard manat likvid vəsaitin ayrılması, hökumətin ABB-nin səhmlərində iştirak payını artırması hesabına Bankın nizamnamə kapitalının yüksəldilməsi, eləcə də Azərbaycan Dövlət Neft Fondunun Bankda 1 milyard ABŞ dolları məbləğində depozit yerləşdirməsi kimi üç istiqaməti əhatə edir.
Hökumət dəstəyinin əsas məqsədi ABB-nin kredit portfelinin keyfiyyətinin yaxşılaşdırılmasından ibarət olsa da, bu prosesin təsirlərindən biri problemli aktivlərin Aqrarkreditə ötürülməsi ilə ABB-nin valyuta mövqeyinin açılması və bunun nəticəsində manatın son devalvasiyalarının ABB-nin maliyyə mövqeyinə təsir göstərməsidir. Bu təsirlərin aradan qaldırılması və Bankın maliyyə mövqelərinin gücləndirilməsi üçün ABB hazırda hökumət qurumları ilə sıx əməkdaşlıq şəraitində çalışır. Bu fəaliyyət nəticəsində ABB-nin 600 milyon manat dəyərində səhmlərinin əlavə emissiyası və Azərbaycan Maliyyə Nazirliyinin nizamnamə kapitalında iştirak payını artırması hesabına ABB-də dövlətə məxsus səhmlər 82,2%-dən, 91,3%-ə çatıb (Azərbaycan Respublikasının Maliyyə Nazirliyi - 76,7%, Aqrarkredit - 14,6%).
Hazırda hökumətin Azərbaycan Beynəlxalq Bankına gələcək dəstək tədbirləri üzərində iş gedir. Eyni zamanda, Azərbaycan Respublikası Prezidentinin 27 dekabr 2016-cı il tarixli Fərmanında Maliyyə Sabitliyi Şurasına ABB-nin sağlamlaşdırılmasının sürətləndirilməsi ilə bağlı tədbirlərin təsdiqlənərək icrası tapşırılıb, bunun üçün müvafiq vəsaitin ayrılması nəzərdə tutulub.
ABB hazırda digər hökumət qurumları ilə birgə bankın fəaliyyəti üzrə məsləhətçinin təyin edilməsi prosesini həyata keçirməkdədir. Məsləhətçi görülmüş sağlamlaşdırma tədbirlərinin ABB-nin fəaliyyətindəki təsirlərini qiymətləndirəcək və gələcək fəaliyyət üçün lazımi addımları müəyyənləşdirəcək.
Açıqlamada o da qeyd edilib ki, Azərbaycan Beynəlxalq Bankı Maliyyə Nazirliyi ilə sıx koordinasiya rejimində işləyir. İnvestorlar və kreditorlar Bankın fəaliyyətindəki yeniliklər haqqında mütəmadi məlumatlandırılacaq.
Hökumətin Beynəlxalq Banka verdiyi dəstəyin üç istiqaməti açıqlanıb
