Qarşıdan gələn növbədənkənar parlament seçkiləri bir çox tərəfi ilə əvvəlki seçkilərdən fərqlənir.
Kimliyindən asılı olmayaraq indi heç bir namizəd rahat görünmür. Özünəarxayınlıq, "qutudan mən çıxacam” kimi düşüncələr indi əksəriyyətdən uzaqdır.
Görünür elə buna görədir ki, əksər dairələrdə ictimai aktiv gənclər namizəd olaraq seçkiyə qatılıblar. Nisbətən yaşlı namizədlər, xüsusən də beşinci çağırışın deputatları gənclərin seçkilərə namizəd kimi qatılmasından məmnun görünmürlər.
Bir neçə gündən sonra deputatlığa namizədlərin təbliğat-təşviqat kampaniyasına start veriləcək.
Beşinci çağırış Milli Məclisin deputatı olmuş 18 Yeni Azərbaycan Partiyasından olan deputatın adı namizədlər siyahısında yer almayıb. Siyahıdan kənarda qalanlar bunlardır:
Rövnəq Abdullayev, Dilarə Cəbrayılova, Şəmsəddin Hacıyev, Ağacan Abıyev, Xanlar Fətiyev, Mirzəcan Xəlilov, Tahir Süleymanov, İlham Əliyev, Arif Rəhimzadə, Elçin Quliyev, Mirkazım Kazımov, Nəriman Əliyev, Əsabil Qasımov, Bahar Muradova, Sona Əliyeva, Rafiq Məmmədhəsənov, Yaqub Mahmudov və Cavid Qurbanov...
Beşinci çağırış Milli Məclisdə təmsil olunan 46 deputatın isə namizədliyi YAP tərəfindən yenidən irəli sürülüb.
Modern.az-ın məlumatına görə, YAP tərəfindən namizədliyi irəli sürülən hazırkı beşinci çağırış Milli Məclisin deputatlarının növbəti marafonda finalı qazanmaları sırf seçicilərdən asılı olacaq. Yəni onlara açıq şəkildə söylənilib ki, partiyanın nüfuzundan sui-istifadə etməsinlər, özləri də fəal olsunlar.
Ölkə Prezidenti İlham Əliyev müsahibəsində bu məsələ ilə bağlı fikirlərini belə ifadə etmişdi:
- Bilirsiniz, parlament seçkiləri çox önəmli hadisədir və önəmli prosesdir. Mən artıq qeyd etdiyim kimi, ölkəmiz yeni islahatlar dövrünə qədəm qoydu, Prezident Administrasiyası, Nazirlər Kabineti, bəzi mərkəzi icra orqanları, yerli icra orqanları artıq struktur islahatlarını başa çatdırıblar, yaxud da ki, bu islahatlar davam etdirilir. Belə olan halda, parlament də kənarda qala bilməz və növbədənkənar parlament seçkilərinin əsas məqsədi ondadır ki, vaxt itirmədən yeni çağırışlara uyğun qanunvericilik bazası formalaşsın və qanunvericilik sahəsində atılan addımlar ümumi islahatlar kursunu dəstəkləsin.
Digər tərəfdən, onu da bildirməliyəm ki, bizdə parlament dörd ay tətildə olur, iyun, iyul, avqust, sentyabr aylarında işləmir. Belə olan halda biz, sadəcə olaraq, seçkiləri 4-5 ay qabağa çəkdik. Bunun da məqsədi odur ki, vaxt itirmək lazım deyil. Hesab edirəm ki, növbədənkənar parlament seçkiləri cəmiyyət tərəfindən, o cümlədən siyasi partiyalar tərəfindən müsbət qiymətləndirilir. Hazırda bütün şərait yaradılıb. Əminəm ki, Azərbaycanda parlament seçkiləri şəffaf keçiriləcək. Azərbaycan xalqı öz iradəsini göstərəcək və nəticələr Azərbaycan xalqının iradəsini əks etdirəcək. Azərbaycan xalqı layiqli nümayəndələri seçəcək. O nümayəndələr ki, öz qanunvericilik fəaliyyətlərində ümumi işimizə töhfə verəcək. O nümayəndələr ki, onlar öz dairələrində fəal iş aparsınlar. Mən parlament üzvlərinin fəaliyyətinə qiymət vermək istəmirəm, çünki bu, hakimiyyətin başqa qoludur. Ancaq yeni seçiləcək deputatlara tövsiyəm odur ki, onlar öz dairələrində daha fəal olsunlar ki, vətəndaşlar onları tanısınlar, onlara müraciət etsinlər. Onlar yerli və mərkəzi orqanlar qarşısında məsələ qaldırsınlar. Əgər belə olarsa, bax, dediyim o ictimai nəzarətin bir forması da bu olacaq. Çünki bəzi hallarda, mən bilirəm, deputat seçilir, ondan sonra öz dairəsinə heç baş çəkmir, heç maraqlanmır. Sonra da növbəti seçkilər yaxınlaşanda başlayır ki, mənə dəstək verin. Yəni, ona xalq dəstək verməlidir. Əlbəttə, Yeni Azərbaycan Partiyası aparıcı siyasi qüvvə kimi öz namizədlərini müdafiə edəcək. Bu da təbiidir. Bizdə sistem majoritar sistemdir, hesab edirəm ki, çox ədalətli sistemdir. Bu sistem seçilmiş millət vəkilini öz dairəsinə bağlayır. Mən bunu öz təcrübəmdən deyirəm. Çünki mən birinci dəfə 1995-ci ildə majoritar sistem əsasında parlamentin üzvü seçilmişdim. O vaxt mənim dairəm var idi və dairədə çox fəal idim. 2000-ci ildə isə mən artıq Yeni Azərbaycan Partiyasının bir nömrəli namizədi kimi qeydə alındım və seçiləndən sonra elə bil ki, mənim dairəm yox idi və bu, imkan vermirdi ki, mən hansısa bir dairəyə xüsusi diqqət göstərim. Ona görə öz təcrübəmdən deyirəm ki, majoritar sistem seçicilər üçün ən uyğun sistemdir. O halda ki, seçilən deputat fəal olsun və vətəndaşlarla sıx təmasda olsun. Azərbaycan xalqı hər şeyi yaxşı bilir, atalar sözüdür, xalqın gözü tərəzidir. Azərbaycan xalqı layiqli nümayəndələri seçərək, eyni zamanda, təmin edəcək ki, bu nümayəndələr onların problemlərini dilə gətirəcəklər, təklif verəcəklər. Belə olan halda əlbəttə ki, məsələlər və problemlər daha məqbul formada öz həllini tapa bilər.
YAP tərəfindən indiki deputatlardan 46 namizədin adı siyahıya salınmaqla onlara bu formada yüksək dəstək göstərilib.
Ancaq əldə etdiyimiz məlumatlara görə, həmin şəxslərə ciddi şəkildə bildirilib ki, namizədlikləri irəli sürülən dairələrdə fəal olsunlar, seçicilərlə yaxşı işləsinlər. Əks halda digər namizədlərə uduzacaqlar.
Namizədliyi irəli sürülmüş indiki deputatlara xəbərdarlıq edilib: Fəal olmasanız, seçilməyəcəksiniz
