Şəfəqə Doğru » Manşet » “Kirayə mənzillər sosial yox, biznes layihəsidir” - NARAZILIQ

“Kirayə mənzillər sosial yox, biznes layihəsidir” - NARAZILIQ

“Kirayə mənzillər sosial yox, biznes layihəsidir” - NARAZILIQ

Uzun müddətdir satışı gözlənilən kirayə mənzillərlə bağlı açıqlanan ilkin məlumatlar geniş müzakirələrə səbəb olub. Təəssüf ki, uzun illərdir ev sahibi olmaq üçün bu fürsətdən yararlanmaq istəyənlər üçün şərtlər əlçatan deyil. Müzakirələrin əsasını da bu amil təşkil edir.

 

"Məsələyə yenidən baxılmalıdır”

 

Məsələ ilə bağlı Modern.az-a danışan V çağırış Milli Məclisin deputatı Vahid Əhmədov şərtlərin əlverişsiz olduğunu dilə gətirib:

 

"Sosial şəbəkələrdə gedən müzakirələrdən xəbərdaram. Həqiqətən də qiymətlər aztəmiantlı, evsiz əhali üçün əlçatan deyil. İlkin ödəniş üçün 7 min manat çox böyük məbləğdir. Əgər bu evlər faizsiz verilirdisə, ilkin ödəniş də az olmalı idi. Yox əgər faizi də bəri başdan hesablayıblarsa, bu layihənin effektivliyi qalmır. Əvvəlcədən bildirmişdilər ki, aylıq 200-300 manat ödəməklə vətəndaş 25-30 il ərzində həmin mənzilə sahib olacaq. Amma indiki rəqəmlər heç də məsələnin əvvəldə bildirildiyi kimi olmadığını deməyə əsas verir. Çünki indiki şərtlər daxilində sosial təminatı zəif olan insanlar kirayə mənzil sahibi ola bilməyəcəklər. Ona görə də məsələyə baxmaq lazımdır”.

 

300 mənzillik layihə...

 

İqtisadçı Natiq Cəfərli Modern.az-a bildirib ki, kirayə mənzillər sosial layihə olaraq təqdim edilmişdi:

 

 

"Aztəmiantlı, gənc ailələrə mənzilə çıxış imkanlarının asanlaşdırılması kimi həyata keçirilcəyinə dair bəyənatlar var idi. Əvvəlcədən deyirdilər ki, kredit faizləri hesablanmayacaq. Amma ilkin məlumatlar açıqlanarkən məlum oldu ki, mənzillərin satışı faizsiz elan olunsa da, faizlər əvvəlcədən hesablanaraq, ümumi qiymətin üzərinə gəlinib. Ona görə də qiymətlər çox yüksəkdir. Normalda kirayə şərtlərilə satışa çıxarılan mənzili nağd şəklində 3 dəfə ucuz qiymətə almaq olar. İkinci məsələ mənzillərin sayının məhdud olması ilə bağlıdır. Ümumilikdə 300-dən yuxarı sayla məhdudlaşan mənzillər ciddi sosial layihəyə çevrilə bilməyəcək. Bununla insanların mənzilə tələbatının ödənilməsi mümkün deyil. Üçüncü məsələ ondan ibarətdir ki, bunlar fiksə olunmuş qiymətlər deyil. Əgər sabah müqavilə şərtlərinə görə manatın məzənnəsilə bağlı dəyişiklik, inflyasiya qeydə alınsa, qiymətə yenidən baxılacaq.

 

Fors-major situasiyalarda bütün məsuliyyət və əziyyət alıcının üzərinə qoyulur. Bütün bunları nəzərə alsaq, kirayə mənzil layihəsinin sosial layihə olmaqdan çıxaraq, insanlarda qıcıq yaradır”.

 

"Bu, sosial layihə olmaqdan çıxıb”

 

Ekspert qeyd edib ki, biznes layihəsi sosial layihə adı altında cəmiyyətə sırınır:

 

"Sosial şəbəkələrdə gedən müzakirələr də insanların narazılığını göstərir. Açıqlamalarla bu layihəyə ümid edənlərin ümidləri puça çıxdı. Bu həm də sosial layihə olmaqdan çıxıb və kommersiya layihəsinə çevrilib. Çünki mənzillərin lokasiyasına baxdıqda görürük ki, müxtəlif ərazilərdə yerləşən mənzillərdir. Bu da onu deməyə əsas verir ki, dövlətin balansında olan, satışı birbaşa nağd şəklində həyata keçirilən mənzillərin bu şəkildə baha satılmasına qərar verilib. Sanki sosial layihə biznes layihəsinə çevrlib. Təəssüf ki, layihəhinin indidən uğursuz olduğunu demək mümkündür”.

 

İlkin məlumatalara görə, kirayə üsulu ilə satılacaq mənzillərin sayı 331-dir. Mənzillərin 208-i Bakı şəhəri, Nizami rayonu, M.Abbasov küçəsində ("Neftçilər” və "Qara Qarayev” metrostansiyalarının yaxınlığında), 40-ı Bakı şəhəri, Xətai rayonu, Gəncə prospektində, 58-i Abşeron rayonu, Xırdalan şəhəri 21-ci məhəllədə, 25-i Sumqayıtda yerləşir. 1 kvadratmetri 1840 manata başa gələcək mənzillər üçün ilkin ödəniş 7 min manatdan yuxarıdır. İpoteka və Kredit Zəmanət Fondu isə bu qiymətlərin şərti olduğunu, real qiymətlərin yaxın günlərdə açıqlanacağını bildirib.